收到阿Sir留言， 真係教書阿Sir， so far我未俾人告， 放心， 不過出完呢個post唔敢講， 呢個page都係得罪人多架喇。
阿Sir話正值DSE結束，唔少中六同學開始搵暑期工，想提醒佢哋小心求職陷阱， 所以希望分享部分文章， 我梗係歡迎啦， 咁啱幾日前又收到網友Aranda分享一幅討論區截圖， 咁我就決定撈埋一齊做瀨尿牛丸出post喇。
【香港討論區】嗰位樓主好似講得太誇張， 有呃like之嫌， 不過現實中又真係有咁嘅事， 例如保險咁， 借糧喺10年前已經唔係新聞， 你又借佢又借， 點解公司批你5000蚊"底薪"， 但又批另一個同事8000蚊呢? 係咪佢靚仔或靚女過你呢? 點衡量呢?
首先呢啲所謂底薪， 其實只係借貸， 你要做夠數先有資格攞， 否則係要還， 文章尾有條link分享， 大家稍後可以click入去睇案例。咁公司點樣信你即使做唔夠數， 都可以還到呢筆債呢? 你值得佢借幾多呢? 身光頸靚唔一定有錢， 最實際就係睇你住邊， 雖然半山層樓係你阿爸買， 唔係屬於你， 但第日你做唔到數， 都保證屋企人有能力幫你還， 加上喺咁現實嘅行業當中， 你住邊亦代表咗你嘅人際網絡。
遇過求職者同我分享， 佢點樣俾之前間保險公司追數， 對方又搵爛仔又出律師信， 最後要屋企幫佢還， 所以呢啲事確實存在。其實保險都係一份職業， 亦有好多人本住良心嚟做， 唔應該一竹篙打一船人， 不過有啲公司嘅手法就不敢恭維， 我始終覺得有返工就應該有糧出， 就算返工捱肚餓唔食飯， 搭車返office都要錢啦， 借糧嘅概念我點都唔認同， 想入行嘅人一定要諗清楚、睇清楚同埋問清楚， 否則付出嘅代價可以好大。
案例
http://m.baby-kingdom.com/post.php…
#預咗得罪人 #以後唔使旨意有廣告喇
Search